Zyra e Komisionerit për Zgjerimin, Johannes Hahn, ka zbardhur takimin e mbajtur në Maltë mes tij dhe liderit demokrat Lulzim Basha. “Debati politik nuk duhet të bëhet jashtë, por brenda parlamentit,” – ka theksuar Hahn në takim, sipas zëdhënëses Maja Koçijançiç.
Bashkëpunimi i qeverisë dhe opozitës është vendimtar për ambicjen e vendit për t’u anëtarësuar në BE. Komisioneri përsëriti gjithashtu rëndësinë e pjesëmarrjes në zgjedhje.
Vazhdimësia parlamentare duhet ruajtur, sipas tij në një kohë kur reformat thelbësore janë në rendin e ditës së parlamentit, të tilla si ngritja e organeve të verifikimit për reformën në drejtësi dhe reforma zgjedhore, përfshirë ndjekjen e rekomandimeve të vëzhguesve zgjedhor të OSBE / ODIHR-it, të cilat janë të domosdoshme për të siguruar zgjedhje të lira dhe të ndershme.
