Kryesfida e javës së 22 të Superligës shqiptare ajo mes Egnatias dhe Partizanit e mbyllur në barazim 1-1 ishte një nga pikat e diskutimit në “Studio Sport” të moderuar nga Vilma Masha në Vizion Plus.
Për ish-trajnerin e kombëtares shqiptare, Astrit Hafizi, pavarësisht barazimit, Egnatia është një skuadër që të argëton.
“Pamë një ndeshje mes vendit të parë dhe të dytë. Janë dy skuadrat që kanë gabuar më pak. Partizani vinte nga një ndeshje e mirë në Shkodër, Egnatia kishte sigurinë e saj. Është një skuadër që nuk sforcohet shumë. Egnatia është një skuadër që të argëton pak, del nga mënyra e lojës taktike, që përdoret zakonisht në futbollin ton. Egnatia të argëton”, tha Hafizi.
Ndërkohë trajneri Klevis Dalipi e vlerësoi këtë sfidë si ndeshjen më të bukur deri tani. Sipas tij sfida mes Egnatias dhe Partizanit ishte një ndeshje e vërtetë.
“Partizani ishte më konkret në pjesën e parë. Në pjesën e dytë pashë një Partizan shumë të nervozuar. Përsëri Egnatia ishte më mrië, deri në momentin që Partizani shënoi. Mos harrojmë që një vit më parë Egnatia e barazoi Partizanin në fund fare. Kishte ritëm, kishte duele të luftuara. Ishte një ndeshje “vitrine” një ndeshje e luftuar dhe e vërtetë”, tha Dalipi.
/Vizionplus.tv/
