Ish-deputetja Grida Duma vlerësoi se kryedemokrati Lulzim Basha është njeriu i duhur të cilit mund t’i besohet për ndryshimin në Shqipëri.
Teksa PD prezantoi programin “Shqipëria fiton mirëqenien sociale”, Duma tha se ky plan do të bëhet realitet sepse ai është konkret dhe i detajuar.
Duke akuzuar qeverinë se në tetë vite solli vetëm dështim dhe rrënim, ish-deputetja shtoi se PD do të vërë në zbatim planin sapo të fitojë zgjedhjet.
“Me të drejtë Shqiptarët presin dhe i kanë varur shpresat tek ne, që të udhëheqim ndryshimin, të prijmë me anijen e zhvillimit, një rrugëtim për të cilin ky vend ka kaq shumë nevojë. SEPSE VIJMË NGA Tetë vjet dështime! Ky është një plan gjithëpërfshirës. Është një plan serioz. Është një plan i realizueshëm. Një plan për të cilin do të dedikohemi të gjithë ta zbatojmë, sapo të fitojmë zgjedhjet, dhe gongu i kohës të bjerë në 25 prill. Koha e zgjidhjes erdhi! Ne kemi punuar për një plan konkret dhe të detajuar që siguron një të ardhme shumë më të mirë për Shqipërinë dhe shqiptarët. PO KY PLAN DO JETË REALITET, FAKT SEPSE: Unë e njoh Lulzim Bashën, e njoh dhe them me besim e bindje të plotë, se ai është njeriu i duhur në kohën e duhur për të sjellë ndryshimin e duhur, për të cilin vendi ka kaq shumë nevojë. Ne të gjithë, me qartësi dhe bindje kemi besim tek Lulzim Basha, për të udhëhequr Shqipërinë tonë me një qeverisje njerëzore, drejt një të ardhmeje më të mirë, drejt një ekonomie më të fortë, drejt një vendi që ka njerëzit e duhur që kujdesen për qytetarët e vet.”
