Fqinji ynë jugor vazhdon të përballet me përhapjen e flakëve që kanë përfshirë mijëra hektarë pyje, tokë bujqësorë dhe banesa. Disa persona kanë kërkuar kujdes mjekësor por fatmirësisht nuk janë regjistruar viktima. Kryeministri Kyriakos Mitsotakis ka shpallur gjendjen e jashtëzakonshme ndërsa në 6 rajone është aktivizuar alarmi i kuq i rrezikut.
Kreu i ekzekutivit bëri thirrje për bashkim dhe mirëkuptim në këto ditë kritike.
KYRIAKOS MITSOTAKIS
KRYEMINISTER I GREQISE
“Ne po përballemi me një situatë jashtëzakonisht kritike në vendin tone, dhjetëra zjarre janë aktivë në të njëjtën kohë. Tre prej tyre, në Atikë, Evia dhe Ilia, me përmasa dhe intensitet të madh. Fatkeqësisht, vështirësitë janë ende para nesh pasi presim erëra të forta perëndimore në shumë zona të vendit tonë. Po flasim për kushte të pashembullta, pasi kanë paraprirë shumë ditë të nxehti intensiv, që e kanë kthyer të gjithë vendin në një fuçi pluhuri.”
Mijëra njerëz në Athinën veriore u evakuuan nga shtëpitë e tyre gjatë natës pasi shpërthyen njëkohësisht disa vatra të reja zjarri. Një sipërfaqe pyjore prej 5 mijë hektarësh dhe dhjetra shtëpi u shkatërruan.
Rumania dhe Zvicra i janë bashkuar Qipros, Francës dhe Suedisë duke ndihmuar me zjarrfikës, kamionë dhe helikopterë.
Lufta me flakët vazhdon ende edhe në Spanjë, në brigjet jugore të Turqisë si dhe në jug të Italisë. Dëmet janë të pallogaritshme ndërsa erërat e forta dhe të nxehta që vijnë nga Afrika e Veriut, po e vështirësojnë edhe më shumë ndërhyrjen e grupeve operacionale.
