Turistët do të jenë të mirëpritur të vizitojnë Greqinë këtë verë por rregullat e distancës sociale do të mbeten në fuqi për t’i mbajtur njerëzit të sigurt nga koronavirusi. Kjo ishte deklarata e ministrit grek të Turizmit, Harry Theocharis.
“Ne duam që njerëzit të vijnë në Greqi. Sigurisht që do të marrim masa paraprake përsa i përket kërkesave para udhëtimit, por edhe përsa i përket mënyrës së udhëtimit, mënyrës së qëndrimit. Do të zbatohen rregullat e distancës sociale.”
Theocharis tha se Greqia ka më shumë se 50 vjet që mirëpret turistë dhe se tani është momenti që të tregohet mikpritja për të cilën grekët njihen.
Ai shtoi se turistët duhet të ndjehen të sigurt në Greqi pasi vendi do të marrë masa paraprake të rrepta.
“Greqia është një vend i sigurt dhe në shumë raste shumë më e sigurt – më vjen keq ta them atë – se vendi juaj.”
Sipas ministrit grek, po mendohet që para se të futen në Greqi, udhëtarët të bëjnë testin për koronaviurs.
