Zyrat e Këshillit të Qarkut në Vlorë kanë rënë pre grabitjes gjatë natës.
Një person ende i paidentifikuar përmes forcës theu dyert e dy zyrave, që merren me administrimin e pronave dhe mori disa dokumente. Ngjarja ndodhi pak para mesnate, ndërsa vjedhja u zbulua nga roja i objektit, i cili njoftoi policinë.
Dyshohet se grabitësi ka hyrë nga dritarja, me qëllim që të mos pikasej nga rojet. Ndërkohë, ende nuk dihet se çfarë dokumentesh kanë humbur, ndërsa të gjitha të dhënat, sipas autoriteteve, janë hedhur në sistem.
BARDHYL GJIKA – DREJTOR I ADMINISTRIMIT DHE MBROJTJES SE TOKES
Po bëjmë një inventar për të konstatuar dokumentet që mungojnë. Këto janë zyra të një rëndësie në raport me zyrat e tjera të këshillit të qarkut. Nëse ka humbur një dokument ka rrezik, pasi nuk mund të zëvendësohet me fotokopjen.
Ndërkohë, hetuesit kanë sekuestruar kamerat e sigurisë rreth zonës dhe po punojnë për identifikimin e autorit.
Zyrat e administrimit të pronave ndodhen në katin e tretë të pallatit të kulturës në Vlorë. Ato merren kryesisht me menaxhimin dhe regjistrimin e tokës bujqësore dhe pyjore në rang qarku.
