Goditi disa herë me thikë në kurriz dhe krah një 19-vjeçar, arrestohet i mituri

Një 16-vjeçar përfundoi në prangat e Policisë së Kamzës këtë të mërkurë. I mituri akuzohet se ka goditur disa herë me thikë një 19-vjeçar, pas një konflikti banal që pati me të.

19-vjeçari mori dëmtime të rënda në kurriz dhe në krah dhe ndodhet i shtruar tek spitali i Traumës, jashtë rrezikut për jetën.

Për të njëjtën ngjarje, u procedua penalisht edhe një 34-vjeçar. Ai është shoku i të plagosurit me thikë. Për të marrë hak për shokun e tij, 34-vjeçari goditi me mjete të forta në trup të miturin.