Një grup kriminal që trafikonte vepra të çmuara arkeologjike që i përkisnin periudhës së antikitetit, është goditur nga policia e Fierit.
Në pranga kanë rënë Shpëtim Kalemi, 51 vjeç dhe Pandeli Petani, 57 vjeç të cilët akuzohen se kanë trafikuar nga Greqia vepra arti, ikona të autorëve grekë të periudhës bizantine, si dhe objekte të tjera që datojnë që nga antikiteti.
“Shërbimet e Policisë gjetën dhe sekuestruan në cilësinë e provës materiale 107 vepra arti të dyshuara të trafikuara nga shteti grek, ndër të cilat ikona dhe piktura të autorëve grekë dhe rumunë, shpata dhe sende të tjera që dyshohet se i përkasin periudhës së antikitetit, një kokë mermeri e dyshuar e shekullit të dytë para lindjes së Krishtit, të gjitha këto me vlerë rreth 1.5 milionë euro, si dhe automjeti furgon me të cilin autorët transportonin veprat nga shtetit grek, në Shqipëri, municion luftarak, një sasi lënde e dyshuar narkotike kanabis sativa dhe një peshore elektronike”, tha drejtori i Policisë së Fierit, Lorenc Panganika.
Mbi dy të arrestuarit rëndojnë veprat penale “Trafikimi i veprave të artit dhe kulturës”, “Trafikimi i armëve dhe municionit luftarak” dhe “Prodhimi dhe shitja e lëndëve narkotike”, të kryera në bashkëpunim.
Ndërkohë, policia ka njoftuar se do të bashkëpunojë me autoritetet greke për të zbardhur dhe dokumentuar veprimtarinë kriminale dhe për kapjen e personave të tjerë që mund të jenë të përfshirë. /vizionplus.tv
