Gjykata e Posaçme e Kosovës për krime lufte me seli në Hagë dënoi me 26 vjet burg ish-komandantin e Ushtrisë Çlirimtare, Sali Mustafa.
Ai u shpall fajtor për vrasje dhe tortura në një qendër paraburgimi në Kosovë, ku sipas prokurorëve, të burgosurit që ishin kundërshtarë politikë të UÇK-së, rriheshin e torturoheshin çdo ditë.
Organi i akuzës pretendoi Mustafa personalisht ka marrë pjesë në torturat ndaj të paktën gjashtë të burgosurve e po ashtu ka qenë i pranishëm kur njëri prej tyre është lënduar aq rëndë sa që më vonë ka vdekur.
Sipas prokurorisë, krimet dyshohet të jenë kryer gjatë muajit prill të vitit 1999 në një qendër ndalimi në fshatin Zllash.
Më 13 shtator prokurorët në Hagë kërkuan që Mustafa të dënohet me 35 vjet heqje lirie, nën pretendimet se kishte drejtuar një “dhomë torture” gjatë luftës.
50-vjeçari i ka mohuar akuzat dhe avokatët e tij thanë se rrëfimet e dëshmitarëve të prokurorisë ishin të pavërteta.
Procesi kundër Mustafës filloi në shtator të vitit 2021. Ai u arrestua për veprat penale; ndalim arbitrar, trajtim mizor, torturë dhe vrasje të paligjshme gjatë periudhës së luftës në Kosovë.
Aktualisht në Hagë ndodhen edhe ish-drejtuesit e Ushtrisë Çlirimtare të Kosovës, Hashim Thaçi, Kadri Veseli, Jakup Krasniqi dhe Rexhep Selimi, të cilët u arrestuan në nëntor të vitit 2020.
Dënimi i kësaj të premteje është i pari i dhënë nga Gjykata Speciale për pretendimet për krime lufte.
