Gjykata e Lartë shtyn “BREXIT”

Kryeministrja britanike Theresa May dhe mbështetësit e fushatës per daljen e vendit nga Bashkimi Europian janë të pakënaqur nga një vendim i Gjykatës së Lartë, që mund ta ngadalësojë këte proces. Gjykata vendosi në favor të një grupi aktivistësh pro BE-së, që pretendonin se vetëm Parlamenti me votë e ka në duar nisjen e Brexit. Kjo do të thotë se qeveria nuk mund ta aktivizojë nenin 50 të Traktatit të Lisbonës për nisjen e bisedimeve formale me BE-në, pa u votuar më parë nga parlamenti dhe procesi mund të shtyhet. Duke lexuar vendimin, gjykatësi John Thomas sqaroi se parimi thelbësor i Kushtetutës së Mbretërisë së Bashkuar është se parlamenti është sovran. Por kryeministrja theksoi se referendumi i 23 qershorit i dha të drejtë qeverisë për të vendosë për procesin dhe deklaroi se do ta apelojë vendimin. May kishte paralajmëruar se do të niste bisedimet për Brexit brenda marsit të ardhshëm. Nderkaq, kreu i laburistëve Jeremy Corbyn kërkoi që qeveria te sjellë sa më shpejt në parlament kushtet e negociatave. Ne referendumin e qershorit 51.9 përqind e qytetarëve votuan për shkëputjen nga unioni. 27 vendet anëtare të BE kanë thënë se negociatat mund të zgjasin deri në dy vjet.