Gjykata e Lartë amerikane ka vendosur t’i japë fuqi të plotë urdhrit të presidentit Donald Trump për ndalimin e udhëtimit në SHBA të shtetasve të gjashtë vendeve kryesore muslimane. Gjykata nuk dha shpjegime rreth vendimit që ndalon shtetasit nga Çadi, Irani, Libia, Somalia, Siria dhe Jemeni, të marrin vizë udhëtimi për në SHBA, edhe nëse ata kanë familjarë atje. Urdhri prek edhe personat nga Koreja e Veriut dhe Venezuela.
Prokurori i Përgjithshëm, Jeff Sessions, e konsideron vendimin e Gjykatës Supreme, si një fitore thelbësore për sigurinë e popullit amerikan. Sipas tij, ndalimi i udhëtimit është një domosdoshmëri përsa i përket mbrojtjes së vendit nga kërcënimet.
Edhe zëdhënësi i Shtëpisë së Bardhë, Hogan Gidley, u shpreh se vendimi i gjykatës nuk është befasues, pasi i shërben sigurisë se vendit.
Urdhri i Trump shkaktoi shumë trazira në radhët e emigrantëve në shtetet e bashkuara. Protestues nga vende të ndryshme mbajtën tubime në shume shtete amerikane, por edhe ne aeroportet ne Çikago, San Francisco, apo Uashington DC.
