Gjermani, CDU zgjedh pasuesin e Merkel

Partia në pushtet në Gjermani CDU zgjedh këtë të premte pasuesin e Angela Merkel në krye të saj. Zgjedhja do të bëhet në një kongres në Hamburg, ku marrin pjesë 1.001 delegatë.

Tre janë kandidatët për të cilët do të votohet:

Sekretarja e Përgjithshme e CDU-së, Aneghart Kramp Karenbauer. 56-vjeçarja njihet si njeri i besuar i Merkelit. Ajo po ashtu është një nga zërat më të spikatur konservatorë, kundër martesës së homoseksualëve.

Kandidati i dytë është Friedrich Merz 63 vjeç, i cili mbron një qasje më të afërt me biznesin.

Ndër kandidatët, është edhe 38-vjeçari Jens Spach, kritiku i Merkelit për çështjen e refugjatëve, i cili u bë ministër i Shëndetësisë në muajin mars. Sipas Spach çështja kryesore është siguria e Gjermanisë. Sondazhet tregojnë se Spach ka shanse të pakta për të fituar kryesimin e CDU.

Zgjedhjet vijnë në një moment kur udhëheqësja e unionit kristiandemokrat, kancelarja e Gjermanisë që nga viti 2005 Angela Merkel njoftoi në muajin tetor se do largohet nga pozita e liderit të partisë dhe nuk planifikon të marrë pjesë në garën për postin e kancelares, duke i hapur rrugën kështu garës për kryetarin e partisë dhe kancelarit të ardhshëm të Gjermanisë.