Sekretari për Çështjet Ligjore në PD, Çlirim Gjata reagoi këtë të martë për ligjin që ka propozuar mazhoranca për betimin e gjyqtarëve të Gjykatës Kushtetuese. Në një deklaratë për mediat, Gjata akuzoi mazhorancën se gjithë këtë po e bën që në Kushtetuese të emërojë shërbëtorët e saj.
“Pasi dështoi me skemën për të imponuar emërime të paligjshme në këtë gjykatë, Edi Rama po tenton të ndryshojë procedurën e betimit të anëtarëve të Gjykatës Kushtetuese. Shërbëtorët e tij në drejtësi nuk do të shkojnë më të bëjnë betimin para noterit, siç ndodhi pak javë më parë, por do ta bëjnë atë me postë, përmes një deklarate e shkrim. Ky akt shkon kundër interesit të qytetarëve shqiptarë, të cilët duan një drejtësi të pavarur, duan një gjykatë kushtetuese që mbron interesin publik dhe jo interesin privat të politikanëve dhe kryeministrit të vendit.”
Për demokratin, ky ligj bie ndesh me Kushtetutën. Çlirim Gjata shtoi se ai u mohon shqiptarëve të drejtën për një shtet ligjor.
“Mbi të gjitha, akti i Edi Ramës është një goditje kundër Kushtetuës dhe shtetit ligjor, pasi në neni 129 i Kushtetutës sanksionon në mënyrë të qartë dhe urdhëruese se “Gjyqtari i Gjykatës Kushtetuese fillon detyrën pasi bën betimin para Presidentit të Republikës.” Kushtetuta nuk lejon asnjë lloj procedure tjetër betimi, as me noterët, as me postierët e Edi Ramës. Kushtetuta e Shqipërisë e ka dhënë vetë zgjidhjen. Në rast konflikti shkohet në Gjykatën Kushtetuese. Për Partinë Demokratike ky është një akt I dënueshëm, që shkon kundër aspiratës së shqiptarëve për një shtet ligjor, që funksionon me standardet më të mira europiane dhe për një drjetësi që të barabartë për çdo qytetar.”
Po gjatë të martës reagoi edhe nënkryetari i LSI, Petrit Vasili, i cili po ashtu kundërshtoi propozimin ligjor të mazhorancës. Edhe për të, është e papranueshme që betimi i gjyqtarëve nga presidenti të kryhet me postë.
