Të paktën gjashtë persona, mes tyre tre ndihmës mjekë, humbën jetën pas një sulmi ajror izraelit në qytetin Harouf në jug të Libanit, sipas Ministrisë së Shëndetësisë së Libanit. Një tjetër ndihmës mjek ndodhet në gjendje të rëndë pas goditjes së një qendre të mbrojtjes civile.
Sulmi vjen në një moment kur Shtetet e Bashkuara njoftuan se Izraeli dhe Libani kanë rënë dakord për zgjatjen me 45 ditë të armëpushimit mes dy vendeve.
Armëpushimi ishte shpallur më 16 prill nga presidenti amerikan Donald Trump, por pavarësisht kësaj, përplasjet mes Izraelit dhe Hezbollah kanë vazhduar pothuajse çdo ditë.
Zëdhënësi i Departamentit Amerikan të Shtetit, Tommy Pigott, deklaroi se bisedimet synojnë arritjen e një paqeje të qëndrueshme mes dy vendeve dhe garantimin e sigurisë përgjatë kufirit të përbashkët.
Sipas tij, negociatat politike do të rinisin në qershor, ndërsa më 29 maj në Pentagon do të zhvillohet një takim i veçantë mes delegacioneve ushtarake të të dyja vendeve.
Ambasadori izraelit në SHBA, Yechiel Leiter, i cilësoi bisedimet si “të sinqerta dhe konstruktive”.
Ndërkohë, kryeministri libanez Nawaf Salam tha se shpreson të sigurojë mbështetje arabe dhe ndërkombëtare për të forcuar pozitën e Libanit në negociatat me Izraelin.
Izraeli ka intensifikuar ditët e fundit sulmet ajrore dhe bombardimet në jug të Libanit, duke deklaruar se objektiv janë luftëtarët dhe infrastruktura e Hezbollahut.
Nga ana tjetër, Ministria e Shëndetësisë e Libanit ka akuzuar Izraelin për shënjestrim të civilëve dhe ekipeve të emergjencës, akuza që Tel Avivi i mohon.
Ushtria izraelite deklaron se synon krijimin e një zone tampon në jug të Libanit për të parandaluar sulme të ardhshme nga Hezbollah.
Organizatat e të drejtave të njeriut kanë paralajmëruar se disa prej sulmeve mund të konsiderohen krime lufte, ndërsa Izraeli i ka hedhur poshtë këto pretendime.
Konflikti u përshkallëzua më 2 mars, dy ditë pasi SHBA dhe Izraeli ndërmorën një sulm të përbashkët ndaj Iranit.
Pas kësaj, Hezbollah lëshoi raketa drejt Izraelit, ndërsa Izraeli reagoi me sulme ajrore masive dhe ofensivë tokësore në jug të Libanit.
Sipas autoriteteve libaneze, të paktën 2.896 persona janë vrarë në Liban që nga fillimi i përplasjes, ndërsa Izraeli raportoi 18 ushtarë dhe katër civilë të vrarë gjatë së njëjtës periudhë.
Bombardimet e vazhdueshme kanë detyruar mbi një milion persona të largohen nga shtëpitë e tyre në Liban./vizionplus.tv
