Gjarpërinjtë blu, sa të bukur aq edhe jashtëzakonisht helmues, janë kthyer në trendin më të ri në Kinë, pas suksesit të jashtëzakonshëm të filmit të animuar “Zootopia 2”.
Një 21-vjeçar bleu një gjarpër indonezian për 1.850 juanë (rreth 260 dollarë), vetëm dy ditë pas daljes në kinema të filmit të Disney-t më 26 nëntor. Personazhi i tij i preferuar ishte risia e këtij filmi, “Gary De’Snake”, i cili besohet se është frymëzuar nga një specie gjarpri e Azisë Juglindore.
“Zootopia 2 po i ndihmon zvarranikët shtëpiakë të kenë një imazh më të mirë nuk janë krijesa të çuditshme, dhe Gary është personazhi më përfaqësues mes tyre,” tha i riu për CNN. “Më pëlqen entuziazmi dhe ndjenja e përgjegjësisë që ai ka.”
Filmi, i cili u publikua drejt fundit të Vitit të Gjarprit sipas horoskopit kinez, është shndërruar në filmin e huaj të animuar më të suksesshëm të të gjitha kohërave në Kinë, me të ardhura mbi 3,55 miliardë juanë (503 milionë dollarë). Rekordi i mëparshëm mbahej nga “Zootopia” i vitit 2016. Në nivel global, “Zootopia 2” ka kaluar 1 miliard dollarë të ardhura, sipas Box Office Mojo.
Në film, Gary përpiqet të pastrojë reputacionin e familjes së tij dhe të gjithë zvarranikëve me ndihmën e protagonistëve të filmit të parë, çiftit lepur-dhelpër.
I riu kinez theksoi se pronarët e zvarranikëve në Kinë janë përballur prej kohësh me paragjykime, duke u konsideruar si persona me “shije të çuditshme për krijesa të frikshme”. Megjithatë, ai dhe shumë të tjerë e duan aq shumë gjarprin blu të filmit, sa do të dëshironin ta kishin një të tillë në jetën reale, pavarësisht rrezikut nga helmimi.
Pas daljes së filmit, platformat kryesore kineze të tregtisë elektronike kanë shënuar rritje të ndjeshme të kërkimeve dhe çmimeve për këtë gjarpër indonezian – i njohur në Kinë si “gjarpri bambu i ishullit”. Çmimet variojnë nga disa qindra deri në disa mijëra juanë, sipas medias shtetërore The Paper.
Zvarranikët po fitojnë gjithnjë e më shumë popullaritet te të rinjtë kinezë. Deri në fund të vitit 2024, më shumë se 17 milionë njerëz në Kinë kishin kafshë shtëpiake ekzotike, ndërsa tregu i tyre i afrohej 10 miliardë juanëve (1,4 miliardë dollarë), sipas agjencisë shtetërore Xinhua. Mbi 60% e pronarëve i përkasin gjeneratës Z, dhe një raport i vitit 2025 tregon se gjarpërinjtë përbëjnë më shumë se 50% të të gjithë zvarranikëve të mbajtur si kafshë shtëpiake.
/vizionplus.tv
