Shumë shpejt, Greqia do t’i bashkohet vendeve të Bashkimit Evropian që njohin pavarësinë e Kosovës. Garancinë e ka dhënë ministrja e Punëve të Jashtme dhe Diasporës, Donika Gërvalla, e cila ka theksuar se marrëdhëniet me Athinën zyrtare kane hyrë tashmë në një tjetër fazë.

 

“Me Greqinë jemi në rrugë të mirë për konsolidim të përfaqësimit tonë në Greqi. Kemi pasur një ngritje të lehtë të këtij përfaqësimi dhe jemi në bisedime e sipër që këtë përfaqësim ta forcojmë dhe konsolidojmë edhe më shumë. Unë nuk mund të them as data, as muaj e as javë, sepse nuk është serioze të flasim për gjëra që mund të ndodhin në të ardhmen duke spekuluar me data se kur mund të ndodhin. Por mund të ju them se jemi në një rrugë tepër të mirë me Greqinë. Së shpejti do të kemi lajme të mira nga Greqia”, u shpreh Gërvalla.

 

Për njohjen e pavarësisë së Kosovës nga shtete që janë ende skeptike apelon edhe presidenti turk, Rexhep Tajip Erdogan, i cili është shprehur se do të punojë për ta bërë të mundur një gjë të tillë.

 

“Për Kosovën duam të rrisim numrin e njohjeve. Ne do t’i diskutojmë këto çështje në takimin tim me Presidentin e Shteteve të Bashkuara të Amerikës, Joe Biden në Asamblenë e Përgjithshme të OKB këtë vit. Le të punojmë së bashku për njohjen e Kosovës. Unë do t’ua propozoj këtë atyre”, deklaroi Erdogan.

 

Deklaratat, kreu i shtetit turk i ka bërë gjatë një konference për shtyp përpara udhëtimit të tij në Qipro.

Leave a Reply

Your email address will not be published.