Grupi Parlamentar i Partisë Demokratike i drejtuar nga Gazment Bardhi është mbledhur në mesditë, pas kërkesës së disa deputetëve.
Mbledhja ka si qëllim vlerësimin e situatës politike, pas humbjes në zgjedhjet e 14 majit dhe hapat që duhen ndjekur për ringritjen e partisë. Gazment Bardhi ka bërë një draft-propozim, ku theksohet se organizimi nga poshtë-lart synon bashkimin e demokratëve.
Në këtë mbledhje mungojnë Jorida Tabaku, Kreshnik ollaku e Flutura Açka që mësohet se janë në një vizitë në Maqedoni.
Deputetja Dhurata Çupi ka propozuar që partia të drejtohet nga Jorida Tabaku dhe Gazment Bardhi, ndërsa ka përjashtuar mundësinë e zgjedhjeve urgjente në parti, pasi sipas saj janë vrastare. Mbledhja e grupit vjen në një moment ku Lulzim Basha ka nisur takime për t’u rikthyer në krye të PD. Ndërkohë nesër është njoftuar se do të mblidhet edhe Kryesia e Partisë Demokratike.
