Komisioni i Përzgjedhjes për Drejtorin e Byrosë Kombëtare të Hetimit ka caktuar datat kur do të intervistohen kandidatët që garojnë për këtë post. Sipas njoftimit për mediat, në datën 26 shkurt, pra të mërkurën, do të intervistohet katërshja e parë.
“Intervistat do kryhen në rendin alfabetik si më poshtë:
Në datën 26.02.2020
-
Aida Veizaj, ora 10.00
-
Ardian Çipa ora 11.00
-
Artur Beu ora 12.00
-
Ervin Hodaj ora 13.00”
Ndërsa të enjten, në 27 shkurt, do të intervistohen Gentjan Shehaj, Lindita Nushi, Idajet Faskaj dhe Ylli Pjetërnikaj. Intervistat të enjten do të nisin në orën 10:00 dhe për secilin kandidat do të jetë një orë kohë në dispozicion.
Nga ana tjetër, Komisioni i Përzgjedhjes për kreun e BKH ka sqaruar edhe se rezultatet e testit të poligrafit janë konfidenciale, duke mohuar kështu lajmet mediatike.
Deri tani garuesit kanë kryer provat e vrapit, atë të testimit me shkrim, testin poligrafik ndërsa intervistimi është faza e fundit që duhet të kalojnë. Ambasada amerikane theksoi pak ditë më parë se procedurat e testimit për BKH janë marrë nga ato të FBI.
