Kryetari i Grupit Parlamentar dhe njëherësh Drejtuesi politik i qarkut Fier Taulant Balla, ka kërkuar nga SPAK që të hetojë burimin e financimit të fushatës së koalicionit “Bashkë Fitojmë”. Ai ka akuzuar ish kryeministrin Berisha dhe kreun e Partisë së Lirisë, Ilir Meta se po bëjnë fushatë me vlerë mijëra eurosh.
“Partia Socialiste ka vendosur që në këtë fushatë një pjesë të fondeve që na jep KQZ t’ua dhurojmë bashkive duke mbjellë pemë, ndërkohë që Saliu dhe Iliri po bëjnë koncerte 100 mijë euro vetëm për skenën. SPAK nuk duhet të bëjë shurdhin, por kjo faturë 100 mijë euro është një faturë që nuk duhet të shpëtojë pa u hetuar”, shprehet Balla.
Hapja e fushatës elektorale të koalicionit “Bashkë Fitojmë” në stadiumin “Air Albania” shkaktoi mjaft polemika lidhur me burimet e financimit të Berishës. Ky i fundit nuk ka logon e asnjë partie, ndaj nuk ka marrë asnjë qindarkë nga fondet që KQZ ndan për partitë politike në çdo fushatë zgjedhore.
