Prej 24 orësh fshatrat e njësisë administrative Gorë dhe Moglicë në bashkinë e Maliqit janë pa energji elektrike.
Lajmi është bërë i ditur nga administratori i njësisë Gorë Nazmi Qose, i cili tha se e gjithë kjo ka ardhur pas një difekti në nënstacionin e Lozhanit nga ku furnizohen me energji të dy këta fshatra.
Difekti nuk është i lehtë dhe për këtë pritet të vijë brigada e specialistëve të këtyre lloj avarive nga Elbasani.
Gjatë këtyre ditëve ka pasur probleme në furnizimin me energji elektrike në të dy këto njësi administrative për shkak të erës së fortë e cila ka këputur jo vetëm tela të energjisë elektrike, por ka rrëzuar edhe shtylla.
Pasi ekipi i Operatorit të Shpërndarjes së Energjisë Elektrike në Korçë ka riparuar dëmet e shfaqura në këtë zonë, vjen edhe ky difekt në nënstacionin e Lozhanit i cili duket se nuk është i lehtë, pasi kërkon një ndërhyrje më të specializuar.
Ekipi nga Elbasani nuk ka mbërritur ende në zonë dhe nuk dihet se kur do të rikthehet energjia elektrike në Gorë e Moglicë, duke lënë në errësirë 30 fshatra të këtyre njësive administrative.
