Frontex dhe policia kufitare shqiptare kanë ndaluar gjatë hyrjes në territorin e vendit tonë 120 klandestinë sirianë.
Ky është bilanci I operacioneve për kontrollin e kufirit me Greqinë nga datat 1-11 qershor për refugjatët e kapur që hyjnë ilegalisht në rrugë tokësore.
Burime të policisë bëjnë me dije se klandestinët vazhdojnë të shfrytëzojnë kushtet e mira të motit dhe hyjnë grupe-grupe nga vendi fqinj për në territorin shqiptar.
Policia kufitare dhe forcat mbështetëse të Frontex që kanë forcuar masat e kontrollit i kapin klandestinët kryesisht pranë fshatrave Vërlen e Trestenik në Devoll.
Nga 120 refugjatët sirianë të kapur në nië periudhë gati 10 ditore, ka të dhëna se 80 prej tyre janë rikthyer vullnetarisht në Greqi.
Të gjithë klandestinët e kapur I nënështrohen procedurave të marjes në pyetje, dhe më pas pjesa më e madhe e tyre ose deportohen nën mbikqyrjen e policisë ose rikthehen vullnetarisht në vendin fqinj.
Që nga ardhja e efektivave të Fronteks nga data 24 maj rezultojnë 216 refugjatë sirianë të ndaluar në zonën e Devollit të sipërm në kufirin tokësor me Greqinë.
Me përjashtim të refugjatëve familjarë, me probleme shëndetësore që bindin për motivet e azilit të përkohshëm në Shqipëri, pjesa më e madhe rikthehen në kampet që janë ngritur për ata në Greqi.
