Franca pritet të zgjasë gjendjen e jashtëzakonshme edhe gjatë kampionatit europian të këtij viti që do të zhvillohet në këtë shtet. Propozimi është bërë nga kryeministri i vendi Manuel Valls dhe është konfirmuar prej tij edhe në një interviste për radion “France Info”.
“Ne jemi përpara një evenimenti shumë të madh, si europiani dhe duhet të mundësojmë sigurinë, por jo vetëm. Klima e sigurt duhet të ndihet njëkohësisht me festimet e fansave në stadiume e qytete. Kur mendon për organizime te tilla, unë presidenti dhe ministri i brendshëm besojmë se gjendja e jashtëzakonshme duhet zgjatur”.
Propozimi i Valls kërkon për këtë zgjatje duhet të votohet në parlament. Kampionati europian, në të cilin për herë të parë merr pjesë edhe Shqipëria, nis në 10 qershor dhe përfundon më 10 korrik. Për të siguruar rendin dhe mbarëvajtjen e këtij kompeticioni krahas, policisë, shërbimeve inteligjente dhe njësive antiterrorizëm, në gjendje gatishmërie është dhe ushtria.
