Franca i qëndron me vendosmëri propozimit për modernizmin e metodologjisë së zgjerimit duke e konsideruar atë aktualin si jofunksional dhe tepër burokratik. Në një intervistë për DW, europarlamentarja franceze, Natali Luazo ndër të tjera argumentoi se ndikimi rus në rajon është shqetësues dhe unioni deri më tani nuk ia ka dalë që të veprojë në mënyrën e duhur për ta ndaluar.
“Shihni rastin e Serbisë. Ajo është në proces, është duke zhvilluar negociata. Janë duke hapur e mbyllur kapituj duke qenë afër me Rusinë, më shumë se kurrë më parë. Diçka nuk po funksionon dhe ne nuk mund të mbyllim sytë përpara këtij fakti. Zgjerimi nuk është një çështje sloganesh apo biznes. Ne duam që vendet të përgatiten për tu futur në BE. Të mos dështojnë në zbatimin e reformave dhe të venë në rrezik projektin europian.”
Luazo e cila është anëtare e Parlamentit Europian në grupin liberal Renew Europe këmbëngul në idenë se sistemi ka dështuar.
“A mendoni se bisedimet e pranimit në BE janë receta e duhur për t’i bërë vendet që të distancohen nga Rusia? Shihni Hungarinë. Nuk funksionoi. Ne duhet të korrigjojmë të gjithë procesin e bisedimeve të anëtarësimit sepse ka dështuar. Çështja e zgjerimit të BE me Ballkanin Perëndimor është çështje shumë serioze dhe nuk duhet lënë në duart e burokratëve.”
Ndërkohë një ditë më parë, zëdhënësja e Komisionit Europian, Ana Pisonero konfirmoi se metodologjia e re e zgjerimit do të prezantohet shumë shpejt dhe se nuk synon asnjë ndryshim thelbësor të kritereve të pranimit por një rishikim paralel në mënyrë që të jetë më efektiv.
“Ne kërkojmë një proces që të funksionojë për të dyja palët. Ka një debat që po zhvillohet mbi ankesat që kanë edhe vende të tjera anëtare për sistemin aktual. Ballkani perëndimor është një prioritet për ne dhe ajo që duam të bëjmë është që metodologjia e zgjerimit të jetë më zyrtare, dinamike e politike. Dhe do të prezantohet shumë shpejt, përpara samitit të Zagrebit . E kemi bërë të qartë që Shqipëria dhe Maqedonia e Veriut i kanë plotësuar kërkesat, tani është radha jonë të mbajmë premtimet.”
Presidentja e komisionit europain, Ursula Fon Der Lajen, më herët ka deklaruar se metodologjia e re e zgjerimit do të zhvillohet paralelisht me bisedimet për anëtarësimin e vendeve kandidate.
