Parlamenti i Francës miratoi të martën një projektligj kundër terrorizmit, që do të forcojë kompetencat e mbikëqyrjes së policisë, për të kontrolluar me lehtësi shtëpitë, për kufizimin e individëve brenda qytetit të tyre pa miratim nga gjykata si dhe për mbylljen e vendeve ku predikohet gjuha e urrejtjes.
Ministri i Brendshëm, Gerard Collomb justifikoi masat e ligjit duke thënë se niveli i kërcënimit është ende shumë serioz dhe se Franca është në gjendje lufte. Ligji lejon anëtarët e qeverisë, veç gjykatësve, që të miratojnë izolimin e një individi në qytetin e tij dhe detyrimin e paraqitjes një herë në ditë në polici. Autoritetet gjithashtu mund të vendosin perimetër sigurie rreth zonave që konsiderojnë në rrezik dhe gjithçka brenda këtij perimetri si shtëpia apo makina kontrollohen pa mandat.
Më shumë se 240 njerëz janë vrarë në Francë në sulme që nga viti 2015 nga sulmuesit të cilët premtuan besnikëri ose ishin të frymëzuar nga ISIS. Sulmi më i fundit u regjistrua ditën e dielë në Marsejë ku u vranë 2 gra. Një komision parlamentar tani do të kërkojë kompromis mbi amendamentet e parashtruara nga Senati dhe Kuvendi përpara një leximi të dytë dhe votimit përfundimtar, që pritet në mesin e tetorit.
Presidenti Emmanuel Macron, i kritikuar nga rivalët si i dobët për sigurinë gjatë fushatës së tij zgjedhore, tashmë ka vepruar për të mbështetur përpjekjet kundër terrorizmit, duke krijuar një task forcë në qershor për të përmirësuar koordinimin midis agjencive të shumta të zbulimit të Francës.
