Ministrja e Drejtësisë Etilda Gjonaj ka marrë mbështetjen e Francës për bashkëpunim me këshillat e lartë të prokurorisë dhe atij gjyqësor, për të adresuar të gjitha sfidat e reja. Ministrja Gjonaj zhvilloi një takim në Këshillin e Lartë të Magjistraturë, me z. Bertrand Louvel, Kryetar i Parë i Gjykates së Kasacionit, ku të pranishëm ishin edhe z. Gent Ibrahimi, kreu i Këshillit të Lartë të Prokurorisë dhe z. Erjon Muharremaj, përfaqësues i Këshillit të Lartë të Gjyqësorit, të cilët informuan mbi funksionimin e institucioneve të reja.
Ministrja Gjonaj informoi z. Louvel mbi ecurinë e procesit të Reformës në Drejtësi, ngritjen e institucioneve të reja të pavaruara, KLP, KLGJ, subjektet e vlerësuara, si dhe sfidat në këtë nismë. Po ashtu, znj. Gjonaj bëri me dije se në takimin e përbashkët me homologen e saj Franceze u dakordësuan për forcimin e bashkëpunimit nëpërmjet një marrëveshje, pjesë e të cilës, ajo kërkoi që të ishte edhe në drejtim të Këshillave.
Gjatë takimit, z. Louvel shprehu gatishmërinë̈ e bashkëpunimit të Këshillit të Lartë të Magjistraturës në France me Këshillat shqiptare dhe u përcaktuan pikat e kontaktit mes dy institucioneve për fushat konkrete të bashkëpunimit. Ai mbështeti idenë se rritja e besueshmërisë së opinionit publik nëpërmjet shoqërisë civile e bën efektive punën e sistemit të drejtësisë.
Në vazhdim të takimeve zyrtare, Ministrja Gjonaj pati një takim në Gjykatën e Lartë të Parisit me Prokurorin e Prokurorisë Speciale pranë Gjykatës së Shkallës së Parë të Parisit, z. Remy Heitz dhe zv. prokurorin Z. Christophe Perruaux. Në takim u diskutuan mbi format e bashkëpunimit në luftën kundër krimit të organizuar nëpërmjet grupeve hetimore të përbashkëta.
