Presidenti Ilir Meta ka eksploruar fundjavën që lamë pas pyjet e Bizës dhe Martaneshit.
Në një postim në “Facebook”, Meta shprehet se bukuritë e këtyre zonave janë magjepse ndërsa thekson se gjatë eksplorimit është takuar dhe me blegtorë shumtë të cilët punojnë me shumë vështirësi.
“Fundjava e kaluar midis maleve dhe pyjeve të Bizës dhe Martaneshit ishte një mrekulli e shoqëruar me bukuri të ndryshme dhe të panjohura më parë për mua. Vetëm duke udhëtuar në të gjitha drejtimet që lidhin Bizën me rajonet e tjera të vendit e kupton rëndësinë e veçantë të saj strategjike dhe historitë që lidhen me të. Por Biza ka edhe një liqen shumë të bukur dhe impresionues, të rrethuar nga pyje dhe male, për të cilat duhet treguar kujdes dhe vëmendje. Ndërsa monumentet natyrore janë pafund, siç është dhe gjelbërimi i pyjeve dhe maleve drejt Ballenjës në Martanesh. Në këtë udhëtim mes këtyre bukurive magjepsëse pata kënaqësinë të takoja dhe disa nga blegtorët, të cilët punojnë mes shumë vështirësive dhe nuk dorëzohen, me bindjen se një ditë do të bëhet më mirë dhe për ta, do të ketë më shumë vëmendje dhe mbështetje, që këto vende të bekuara të mos braktisen. Ndoshta për këtë ndihmojnë dhe objektet e kultit dhe besimit që ekzistojnë në këtë zonë, që njerëzit t’u qëndrojnë me kurajo disa vështirësive dhe pengesave që nuk i meritojnë.”
Më tej, kreu I shtetit ka ndarë dhe një sërë fotosh gjatë kësaj ekspedite nga ku duket se udhëtimi në zonën e Bizës e Martaneshit i ka lënë mbresa të shumta.
