Këta janë katër anëtarët e familjejes shqiptare që humbën tragjikisht jetën mbrëmjen e djeshme në Itali, si pasojë e dyshuar të helmimit nga monoksidi i karbonit.
Viktimat janë Arti Kola, 48 vjeç, bashkëshortja e tij Jonida Kola, 43 vjeçe, djali i tyre Hajdar, 22 vjeç, dhe vajza e tyre më e vogël, Xhesika, 15 vjeçe. Fotot e familjes u publikuan nga mediat italiane, duke shkaktuar tronditje dhe dhimbje në komunitetin lokal dhe më gjerë.
Lexo edhe :
Shtëpia ku ndodhi tragjedia është në pronësi të Arti Kolës, i cili, sipas dëshmitarëve, e bleu atë rreth tre vjet më parë, por familja ishte zhvendosur vetëm kohët e fundit. Shtëpia me sa duket ishte restauruar nga vetë viktima, bashkë me disa miqtë e tij.
Sipas mediave italiane, që citojnë burime zyrtare, ngjarja dyshohet të ketë ndodhur në orët e mbrëmjes, rreth kohës së darkës. Gjatë hyrjes në banesë, forcat e policisë dhe ekipet e emergjencës gjetën tryezën të shtruar, çka tregon se familja ishte bërë gati për të ngrënë, pa e ditur se po përballej me një rrezik fatal.
Alarmin e ka dhënë një i afërm i familjes, vëllai i kryefamiljarit, i cili, i shqetësuar pasi nuk kishte mundur të kontaktonte me ta, njoftoi karabinierët. Pas mbërritjes në banesën trekatëshe dhe mungesës së çdo përgjigjeje, policia u detyrua të hapë derën me forcë.
Brenda, autoritetet u përballën me një skenë tronditëse, katër anëtarët e familjes u gjetën të pajetë në dysheme. Gjatë ndërhyrjes, një familjar tjetër humbi ndjenjat për shkak të ekspozimit ndaj monoksidit të karbonit, por u shpëtua falë reagimit të shpejtë të karabinierëve dhe u dërgua me urgjencë në spitalin e Cisanellos, ku ndodhet nën kujdesin e mjekëve.
/vizionplus.tv
