Liderët botërorë, ministrat e jashtëm, krerët e qeverive, madje dhe persona të famshëm nga fusha të ndryshme, do të marrin pjesë në takimin vjetor të Forumit Ekonomik Botëror të Davosit, për të diskutuar çështjet më kryesore që shqetësojnë boten.
Kryeministrja britanike Theresa May dhe kancelaria gjermane Angela Merkel do të jenë në mesin e 2500 personave më të pasur dhe më të fuqishëm në forumin e Davosit, në krah të liderëve të Kanadasë, Francës, por edhe presidentit amerikan Donald Trump, i cili pritet të mbërrijë një ditë pas fillimit të takimit ketë jave.
Ai do të mbajë fjalimin e tij në fund të takimit, ndërsa pritet të takohet me liderin francez Emanuel Macron, e liderë te tjerë, ndërsa ende nuk dihet se do te bisedoje me kancelaren Merkel.
Në këtë takim 4 ditor, pritet të mbahen rreth 400 debate ne disa panele, ku në fokus do të jenë siguria kibernetike, armët e shkatërrimit në masë, ekonomia globale, sfidat lidhur me klimën, por edhe inteligjenca artificiale, ekonomia digjitale, varfëria, konflikti dhe hendeku i pagës gjinore, inovacioni shkencor dhe ai i teknologjisë.
Pjesëmarrja e Trump, shihet gjithashtu si një temë e nxehtë, për shkak se ai ushqen ndjenjat antiamerikane në kontinent.
Për herë të parë në historinë 48-vjeçare të forumit ne Zvicër, ngjarja e këtij viti kryesohet nga gratë, në përgjigje ndaj kritikave lidhur me mungesën e përfaqësimit të femrave.
Policia zvicerane ndërkohë ka vënë në gadishmëri mbi 4300 oficerë për të ofruar siguri.
