Fondacioni amerikan jep ndihma për qendrat shëndetësore të Maliqit

Të gjitha qendrat shëndetësore të bashkisë së Maliqit do të kenë të gjitha pajisjet e duhura për ofrimin e shërbimit ndaj pacientëve.

Kjo falë një sasie të konsiderueshme ndihmash që vijnë si dhuratë nga një grup mjekësh amerikanë, të cilët kanë qenë vitin e kaluar në Maliq duke njohur gjendjen e qendrave shëndetësore dhe duke marrë edhe kërkesat e tyre për pajisjet e nevojshme.

Ditën e sotme një kontenier me aparatura mjeksore, krevate dhe të tjera pajisje të nevojshme ka mbërritur në qytetin e Maliqit, për t’u shpërndarë më pas në qendrat shëndetësore. Kryebashkiaku Gëzim Topçiu i ka quajtur mjaft të rëndësishme këto pajisje të cilat kanë teknologji të përparuara, ç’ka do të jetë një ndihmë e madhe për shërbimin shëndetësor të të gjithë bashkisë.

Kanë qenë fondacioni i shërbimit shëndetësor dhe projekti C.U.R.E në Shtetet e Bashkuara të Amerikës të cilët kanë bërë të mundur sjelljen e këtyre ndihmave dhe pajisjeve mjekësore për bashkinë e Maliqit.