Fondi Monetar Ndërkombëtar kërkon që qeveria të ndalojë dhënien e koncesioneve, sidomos ato praktika që jepen me propozim të pa kërkuar. Shefja e misionit të FMN Anita Tuldhar argumenton se praktika të tilla mbartin risqe të cilat nuk evidentohen që në fillim. Ky qëndrim i FMN vjen në një moment kur qeveria sapo ka mbyllur dy kontrata të tilla, për ndërtimin e dy segmenteve rrugore.
Ne nuk jemi kundër partneritet publik privat. Ne jemi te fokusuar tek risqet që mbartin praktika të tilla. E rëndësishme është që të bëhet një analizë lidhur me projektet dhe selektimin e tyre, pasi kemi të bëjmë me investimet publike në tërësi. I gjithë procesi duhet të jetë i kujdesshëm. Ne e dimë që risqet ndahen mes qeverisë dhe privatit por përvoja në vende të tjera ka treguar se shteti merr më shumë seç duhet risk çka në finale përkthehet në kosto. Duhet të plotësohet i gjithë kuadri ligjor dhe me pas qeveria të vijojë me këto praktika.
Në misionin përmbyllës në Tiranë, FMN është ndalur edhe në ndryshimet e pronësisë në sistemin bankar. Sipas tyre shit-blerjet e shpejta të bankave mund të krijojnë stres në sektor.
Shitjet në sektorin bankar duket se kanë përfshirë të gjithë rajonin. Dikush po largohet nga rajoni por të tjerë nuk e shohin më tregun tërheqës, pasi kreditimi ka pësuar rënie. Shitja e shpejtë e aktiveve nga bankat me pronësi evropiane në Shqipëri, mund të çojë në stres të sektorit. Me rëndësi është që blerësi duhet të jetë me përvojë në sistemin bankar me qëllim që të mos cenohet shëndeti i sektorit.
Ndonëse me 1 prill nis zbatimin edhe përfshirja e bizneseve në TVSH me xhiro deri në 2 mln lekë, FMN përforcon qëndrimin e saj se kjo masë nuk do të japë efekte në rritjen të ardhurave.
Ne e kemi shprehur edhe më parë. Ulja e pragut të TVSH do ta shpërqendrojë fokusin e administratës tatimore nga vëmendja e bizneseve të mëdha, aty ku duhet të jetë edhe synimi kryesor. Në nuk jemi të bindur se kjo masë do të japë efekte pozitive.
Misioni i FMN për më shumë se dy javë zhvilloi takime me përfaqësues të institucioneve shqiptare lidhur me ecurinë ekonomiko-financiare në vend.
