Avioni i parë zjarrfikës ka nisur punën për shuarjen e flakëve në Shqipëri.
Në një postim në rrjetin social Facebook kryeministri Edi Rama tha se qeveria është e përgatitur për çdo përkeqësim të situatës, nëse do të ketë, njësoj si në Europë.
“Avioni i parë zjarrfikës ka nisur aktivitetin si forcë e shtuar e këtij gushti sfidues, i cili na gjen më të fortë e të përgatitur se asnjëherë më parë por edhe plotësisht të vetëdijshëm, për largqoftë rrezikun e përshkallëzimeve ekstreme të zjarreve përtej fuqive tona, siç po ndodh në disa vende të mëdha të Europës aktualisht
RESPEKT dhe MIRËNJOHJE për të gjitha forcat tona në terren”, shkruan Rama.
Në 12 orët e fundit, në Shqipëri janë regjistruar 14 vatra zjarri, nga të cilat vetëm 5 vijojnë të jenë aktive.
Operacionet për izolimin dhe shuarjen e tyre po vijojnë me angazhimin e 182 forcave operacionale, 19 automjeteve zjarrfikëse, 3 helikopterëve dhe 1 avioni të Forcës Ajrore.
Ndërhyrjet janë përqendruar në zonën e Dajtit, në fshatin Riban (Mallakastër), në fshatin Shqiponjë (Prrenjas), në Vërzhezhë (Skrapar), në Krekëz (Himarë), si dhe në zonën malore ndërmjet Stegopullit dhe Selckës, në bashkitë Libohovë dhe Dropull.
Në Riban, rreziku për zonat e banuara është eliminuar falë ndërhyrjes nga toka dhe ajri, ndërsa 15 familje u evakuuan përkohësisht si masë parandaluese.
Nga vatrat e shuara janë prekur rreth 1.5 hektarë me barishte, shkurre dhe bimësi pyjore. Sipërfaqja e prekur nga vatrat aktive është ende në vlerësim.
Strukturat e sistemit të mbrojtjes civile vijojnë monitorimin e situatës dhe koordinimin e operacioneve në të gjithë territorin.
