Vladimir Putin do të drejtoje Rusinë edhe per 6 vitet e ardhshme, pas fitores në zgjedhjet presidenciale të së dielës, ku arriti të marrë më shumë se 76% të votave.
Udhëheqësit botërorë kanë nisur mesazhet e tyre të urimit. Presidenti kinez Xi Jinping, në mesazhin e tij tha se partneriteti i Kinës me Rusinë është në “nivelin më të mirë të historisë, që paraqet një shembull për ndërtimin e një lloji të ri të marrëdhënieve ndërkombëtare”.
Por, fitorja masive e Putin është shoqëruar me heshtje të thellë në Perëndim. Asnjë nga udhëheqësit nuk i ka uruar fitoren deri më tani. Mediat perëndimore shkruajnë për fitoren e thellë të presidentit rus, mes manipulimeve flagrante gjatë votimit, duke publikuar video ku shfaqet se si mbushen kutitë nga njerëz që përpiqen të shkaktojnë trazira.
Tensionet midis Rusisë dhe Perëndimit u thelluan ndjeshëm javët e fundit pas helmimit të një ish-spiun në Britani, që qeveria e Britanisë së Madhe fajësoi Rusinë.
Putin, nuk kishte asnjë kundërshtar serioz. Konkurrenti i tij më i afërt, komunisti milioner Pavel Grudinin, mori pak më pak se 12% të votave, ndërsa Aleksei Navalni u përjashtua nga zgjedhjet për shkak të një dënimi me burg.
Në reagimin e tij të parë ndaj rezultatit të zgjedhjeve, Navalny tregoi se do te përmbajë zemërimin e tij. “Tani është sezoni i Kreshmës. Kam vendosur të mos zemërohem më kurrë dhe të mos e shfaq atë”, shkroi ai në Twitter.
Shkalla e fitores e cila ishte parashikuar gjerësisht, tregoi një rritje e dukshme të numrit të votave të Putin nga viti 2012.
