Firence, protesta kundër Salvinit
Më shumë se 2 mijë njerëz kanë protestuar në sheshin Piazza della Repubblica në qytetin e Firences kundër ministrit të brendshëm Mateo Salvini.
Protesta degjeneroi në akte dhune mes qytetarëve dhe policisë gjatë kohës që Salvini po zhvillonte një takim me mbështetësit e tij përkrah kandidatit të Lega Nord për kryebashkiak të qytetit.
Protestuesit u përpoqën disa herë të thyenin kordonin e policisë, ndërsa në duar mbanin pankarta ku kërkonin largimin e Salvinit nga Firence.
Sipas mediave të vendit fqinj, italianët janë të pakënaqur ndaj politikës së ekstremit të djathtë, qasjen e zëvendës kryeministrit Salvini ndaj emigrantëve sirianë, por edhe përdorimin e simboleve e shenjtorëve katolikë në tubimet e tij.
Të dielën kardinali i selisë së Shenjtë në Vatikan Pietro Parolin paralajmëroi Salvinin duke thënë se Zoti u përket të gjithëve.
Protestat kundër Salvinit po mbahen vetëm pak ditë përpara zgjedhjeve në parlamentin evropian.
