Nga këmbëngulja e madhe tek tërheqja e befasishme. Presidenti i FIFA-s, Gianni Infantino, njoftoi zyrtarisht tërheqjen e propozimit për “FIFA Forward Enterprise” (FFE), projektin që do të përfshinte krijimin e një kompanie për të menaxhuar të drejtat tregtare, licencimin dhe organizimin e aktiviteteve të rëndësishme, përfshirë Kupën e Botës, bashkërisht me investitorë privatë, të cilët do të merrnin deri në 20% të aksioneve.
Infantino tentoi t’i joshte 211 federatat anëtare të FIFA-s me pretendimin se ky ishte një plan që do të shëndoshte financiarisht federatat që do të fitonin paraprakisht deri në 40 milionë euro secila, mirëpo ideja e tij shkaktoi menjëherë një valë protestash ndërkombëtare.
UEFA ishte kritikja më e madhe, madje qeveria e futbollit europian shkoi deri atje sa të kërcënonte me bojkot të të gjitha aktiviteteve në rast se nuk do të kishte anulim të projektit.
Konfederatat aziatike dhe ato të Amerikës Qendrore dhe Veriore gjithashtu dolën kundër, ndërsa këshilltari i FIFA-s, Karlos Kordeiro, dha dorëheqjen në shenjë proteste kundër këtij plani. E në këtë mënyrë, përballë pakënaqësisë së mëdha të krijuara në pak ditë, FIFA dhe Infantino kanë vendosur të tërhiqen.
“Pasi dëgjova me kujdes të gjitha pikëpamjet, u bë e qartë se projekti ka krijuar përçarje të një natyre të tillë saqë, pavarësisht nivelit të mbështetjes, nuk është më në interesin më të mirë të objektivit të synuar. Qëllimi ynë ka qenë gjithmonë, dhe gjithmonë do të jetë – të bashkohemi dhe të përmirësohemi. Si pasojë, ky propozim nuk do të ndiqet”, tha ai.
Ky vendim është një përpjekje edhe për të ulur tensionet e dukshme mes FIFA-s dhe disa qeverive të futbollit në kontinente, sidomos me UEFA-n, një institucion që ka krijuar shpesh Infantinos përplasje politike jo korrekte dhe të nxituara në dëm të futbollit.
/vizionplus.tv
