Fier, kapet 7.2 kg Cannabis Sativa, arrestohen dy persona

7.2 kg lëndë narkotike Cannabis Sativa janë sekuestruar këtë të premte nga policia e fierit, ndërsa dy persona kanë rënë në pranga. Specialistët e Sektorit për Hetimin e Trafiqeve dhe Narkotikëve në Drejtorinë Vendore të Policisë Fier, në kuadër të operacionit “STREET” , arrestuan në flagrancë Agron Xhaxhaj, 27 vjeç, banues në Roskovec dhe Ergent Braçe, 28 vjeç, banues në Fermë Çlirim, Fier.
Pas informacioneve të mara në rrugë operative se këta shtetas dispononin lëndë narkotike, në lagjen Nr.2 në Roskovec, Specialistët kundër Narkotikëve bënë të mundur arrestimin në flagrancë të tyre pasi i’u gjetën e sekuestruan në cilësinë e provës materiale 7.2 kg lëndë narkotike e dyshuar Cannabis Sativa.
Gjatë momentit të arrestimit, shtetasi Agron Xhaxhaj ka kundërshtuar me dhunë punonjësin e policisë duke u përleshur me të dhe e ka plagosur lehtë punonjësin me një mjet prerës, i cili ka marrë mjekim në Spitalin Rajonal Fier. Po kështu, edhe punonjësi i policisë gjatë përleshjes ka plagosur lehtë në këmbë me armën e shërbimit shtetasin Agron Xhaxhaj.