Ish ministri i ekonomisë Anastas Angjeli është i mendimit se ka ardhur koha që të ketë një politikë të re sociale, për t’iu përgjigjur realitetit ekonomik të shkaktuar nga inflacioni.
I ftuar në emisionin E-ZONE në Vizion Plus, Angjeli tha se duhet të ketë një rishpërndarje më të mirë të buxhetit, në funksion të rritjes së fondit të pagave, kryesisht për ata me pagë minimale dhe mesatare.
“Jemi në realitet të ri, ndaj na duhet një politike e re sociale në mbrojtje të shtresave më në nevojë. Po vijmë pas disa krizave të njëpasnjëshme, ku goditja më e madhe erdhi nga inflacioni. Ndaj jemi në kohën për një balancim të ri të buxhetit nga pikëpamja e orientimit të shpenzimeve, konkretisht shpenzimeve sociale. Në situata kaq të vështira kontributorë duhet të jenë të dy faktorët e interesit, qeveria dhe biznesi në funksion të mirëqenies sociale”, u shpreh Angjeli.
Sipas Angjelit pagat në administratë publike duhet të rriten në tërësi si dhe duke u fokusuar në veçanti në disa profesione që janë të kërkuara në treg. Ndërsa dhe vet biznesi duhet të sakrifikojë nga fitimet, në mënyrë që të kemi një zhvillim të qëndrueshëm ekonomik.
