Të paktën 10 mijë fëmijë refugjatë, të cilët nuk kanë qenë të shoqëruar nga prindërit e tyre janë zhdukur, pasi kanë mbërritur në Europë. Alarmin e ka dhënë Agjencia Europiane e Inteligjencës Europol, e cila ka publikuar një raport për emigrantët, të cilët kanë mbërritur në BE nga vendet ne krizë. Sipas kësaj agjencie dyshohet se këta fëmijë kanë rënë në duart e organizatave kriminale të trafikut të qenieve njerëzore. Sikurse shprehen zyrtarët e lartë të Europol-it minorene janë zhdukur menjëherë pasi janë regjistruar në shtetet europiane. Nga të dhënat rezultojnë se 5 mijë fëmije kanë humbur vetëm në Itali, ndërsa 1 mijë të tjerët në Suedi. Europol ngre alarmin për një rrjet europian trafiku, që ka krijuar një infrastrukturë kriminale tepër të sofistikuar, e cila ka vënë në shënjestër refugjatët. Ndërkohë organizata “Save the children”, njofton në vitin 2015, se ne Europë kanë hyrë 26 mijë fëmijë, të cilët kanë qenë të pashoqëruar nga prindërit e tyre. Pjesa më e madhe e tyre kanë qenë sirianë.
