Koronavirusi i ri kinez vijon të përhapet me ritme të shpejta duke arritur në cdo rajon të Kinës kontinentale si dhe 16 vende të tjera në botë. 170 persona janë deklaruar të vdekur ndërsa rreth 7800 të tjerë janë infektuar.
Organizata Botërore e Shëndetësisë do të konsiderojë edhe njëherë këtë të enjte mundësinë për të shpallur gjendjen e emergjencës ndërkombëtare.
Shkencëtarët po vijojnë kërkimet për të testuar në kohë rekord një vaksinë e cila normalisht do të kërkontë më shumë se një vit. Edhe në Europë kërkimet vijojnë ndërsa numri i të prekurve ka shkuar në 10, pesë prej tyre në Francë, katër në Gjermani dhe një në Finlandë.
HERMAN GOOSSENS
EKSPERT I MIKROBIOLOGJISE
“Ne kemi një rrjet prej rreth 900 laboratorësh diagnostikues në 42 shtete të Europës dhe aktualisht jemi duke punuar rreth studimeve për trajtimin e koronavirusit të ri. Ne në Europë nuk mund të izolojmë njerëzit si në Kinë për të kontrolluar përhapjen, kjo do të ishte shumë e vështirë. Ajo që duhet të bëjmë është të gjejmë sa më parë vaksinën.”
Testimi i vaksinës tek njerëzit pritet të ndodhë në fillim të qershorit ose në korrik. OBSH sqaron se duhen plotësuar disa kritere dhe po koordinohet puna me të gjithë laboratorët në botë që po operojnë në këtë drejtim.
ANA MARIA HENAO
PROGRAMI I EMERGJENCAVE SHENDETESORE, OBSH
“Ekspertët do të marrin në konsideratë një numër të kritereve, duke përfshirë profilin e pranueshëm të sigurisë, induksionin e përgjigjeve të përshtatshme imunitare dhe disponueshmërinë në kohë të furnizimeve të mjaftueshme të dozave të vaksinave. OBSH do të vendosë se cila vaksinë do të testohet së pari tek njerëzit në ditët në vijim.”
Shtetasit e huaj janë riatdhesuar nga Kina dhe do të mbahen të izoluar për rreth dy javë në vendet përkatëse.
Ndërkohë virusi ka goditur rëndë ekonominë kineze. Disa linja ajrore ndërkombëtare kanë ndaluar fluturimet dhe kompani si Google, Ikea, Starbucks e Tesla kanë mbyllur dyqanet e tyre në Kinë.
