Pas konfirmimit të rastit të parë me Ethet e Nilit Perëndimor në Shqipëri, Instituti i Shëndetit Publik ka nisur hetimin epidemiologjik dhe entomologjik në qarkun e Korçës. Një ekip specialistësh nga Tirana ka mbërritur në terren për të evidentuar praninë e mushkonjave që transmetojnë virusin dhe për të përcaktuar masat e nevojshme të kontrollit.
Rasti i konfirmuar i përket një 72-vjeçari, banor i Lagjes 7 të qytetit të Korçës, i cili ndodhet në reanimacionin e Spitalit Rajonal të Korçës. Sipas burimeve nga spitali, gjendja e tij është e stabilizuar dhe ai po merr trajtimin mjekësor përkatës.
I moshuari dyshohet se është pickuar nga një mushkonjë gjatë kohës që qëndronte në një lulishte, ku kalonte një pjesë të konsiderueshme të ditës. Pas shfaqjes së shqetësimeve shëndetësore, ai u paraqit në spital, ndërsa analizat laboratorike konfirmuan infektimin me virusin e Nilit Perëndimor.
Në kuadër të hetimit, mjekët kanë nisur marrjen e kampioneve të gjakut nga banorë të Lagjes 7. Mostrat do të dërgohen në Institutin e Shëndetit Publik në Tiranë për analiza laboratorike, me qëllim evidentimin e rasteve të mundshme të tjera.
Specialistët e ISHP-së po kryejnë kontrolle në zona të ndryshme të qarkut të Korçës për të përcaktuar praninë e mushkonjës bartëse. Ekipet po kryejnë gjithashtu depistimin në vatër, ndërsa pritet ndërhyrja për dezinfektimin dhe trajtimin e zonave ku mund të evidentohen mushkonja.
Ethet e Nilit Perëndimor transmetohen te njerëzit kryesisht përmes pickimit të mushkonjave të infektuara. Në shumicën e rasteve infeksioni mund të mos shfaqë simptoma, ndërsa në raste të tjera mund të shkaktojë temperaturë, dhimbje koke, dhimbje muskujsh, të përziera dhe të vjella. Në raste të rënda, virusi mund të prekë sistemin nervor dhe të shkaktojë komplikacione serioze.
Autoritetet shëndetësore vijojnë monitorimin në terren, ndërsa rezultatet e analizave dhe hetimi epidemiologjik pritet të përcaktojnë nëse ka raste të tjera dhe masat që do të ndërmerren për parandalimin e përhapjes së virusit.
/vizionplus.tv
