Nësër, 11 prill, partitë nisin zyrtarisht fushatën elektorale për garën e madhe të 11 majit.
Gazetari Mentor Kikia komentoi në Quo Vadis në Vizion Plus risitë e kësaj fushate.
Ai tha se ndryshe nga herët e kaluara, nuk ka zhurmë, por po zhvillohet duke kapur prej xhaketash qytetarët.
Sipas Mentor Kikisë, programet nuk kanë pasur ndikim shumë të madh, sepse premtimet janë shkelur, nuk janë mbajtur.
“Fushata ka kohë që ka filluar. Për shkak të natyrës së partisë, socialistët janë gjithë kohës në fushatë. Për zgjedhjet, të paktën që në vjeshtë, partitë janë vënë në lëvizje. Socialistët do të kenë një program më të detajuar, që më shumë se sa një program është një paketë e përqendruar te pagat dhe pensionet.
Më shumë se premtimet, në këtë një muaj që ka mbetur, do të luhet më shumë me imazhin, do të luhet më shumë me emocionin… Pjesa dërrmuese e njerëzve janë votues besnikë të një partie të caktuar. Programet nuk është se kanë pasur ndonjë ndikim shumë të madh, sepse premtimet janë shkelur, nuk janë mbajtur. Kjo është një perceptim i drejtë nga qytetarët, por i gabuar në raport me seriozitetin që duhet të sjellë politika.
Si asnjëherë më parë, fushata nuk është ajo e zhurmshmja me reklama, por ajo që zhvillohet duke trokitur derë më derë, duke kapur prej xhaketash qytetarët”, tha Kikia.
/vizionplus.tv
