I dërguari special i Shteteve të Bashkuara për Ballkanin Perëndimor, Gabriel Escobar dhe i dërguari i Bashkimit Evropian për dialogun Prishtinë-Beograd, Miroslav Lajçak, kanë thënë për mediat serbe se e ardhmja e Kosovës dhe Serbisë është në BE, por pas normalizimit të marrëdhënieve.
Escobar ka theksuar se duhet të REFUZOHET narrativa se Kosova është Serbi.
GABRIEL ESCOBAR
I DËRGUARI I SHBA PER DIALOGUN
Anëtarësimi në Bashkimin Evropian është prioritet strategjik i Serbisë. Kosova ka thënë shumë herë se dëshiron të anëtarësohet në Bashkimin Evropian dhe strukturat e tjera evropiane. Prandaj, dialogu është mekanizmi me të cilin do të zhbllokohet gjithçka. Gjithashtu duhet të largohemi nga narrativa se Kosova është Serbi dhe të shkojmë drejt narrativës se Kosova dhe Serbia janë Evropë.
Ndërsa Lajçak ka pohuar se rruga drejt Bashkimit Evropian për të dyja palët është përmes dialogut dhe se një marrëveshje gjithëpërfshirëse për normalizimin është urgjente, pasi status quo-ja nuk është e qëndrueshme.
MIROSLAV LAJÇAK
I DËRGUARI I BE PËR DIALOGUN
Ne flasim pothuajse çdo ditë me dy liderët për të shmangur tensionet më të mëdha dhe për të filluar të flasim më shumë për tablonë më të gjerë. Të mos harrojmë se procesi i normalizimit është i lidhur me rrugën evropiane të Kosovës dhe Serbisë, nuk do të ketë anëtarësim në BE për asnjë palë pa normalizim gjithëpërfshirës të marrëdhënieve dhe ata e dinë këtë.
Lajçak është shprehur optimist PËR një marrëveshje gjithëpërfshirëse pasi të dy liderët janë pro normalizimit.
MIROSLAV LAJÇAK
I DËRGUARI I BE PËR DIALOGUN
Anëtarësimi në union është një synim strategjik i Kosovës dhe i Serbisë dhe jam i bindur se progresi në dialog do të jetë i pashmangshëm dhe fakti që të dy liderët tani janë gati të takohen rregullisht në Bruksel është një shenjë e përkushtimit të tyre për të arritur një normalizim gjithëpërfshirës i marrëdhënieve.
Të dërguarit e BE dhe SHBA janë angazhuar intensivisht muajt e fundit për të arritur një marrëveshje finale mes Prishtinës dhe Beogradit.
