Një ditë pas nisjes së procesit mësimor në universitete, kryebashkiaku Veliaj është takuar me studentët të gjuhëve të huaja. Kryeqyteti sipas tij, është gati të mirëpresë e të mbështesë të gjithë të rinjtë që janë në rrugën e dijes.
Erion Veliaj: “Pyetja është se çfarë do të bëjmë me jetën tonë? Mund të vijmë vërdallë tre vite nëpër Tiranë, ose mund të themi: Hej, kjo është maratonë, duhet vrapuar përditë sepse ndërkohë që ti je pushim, po vrapon dikush tjetër. Nëse dikush vjen nga një provincë e Shqipërisë, duam ta dini se në Tiranë ju presim krahëhapur, ju respektojmë, dhe jemi tifozët më të mëdhenj të suksesit tuaj. Besojmë se shtimi i Tiranës me studentë të mirë, me njerëz të mirë, me qytetarë të devotshëm, me njerëz të rinj pasionantë, e bën qytetin më të mirë, jo më të keq”.
Tirana, si një qendër e zhvillimit politik, kulturor e ekonomik i jep mundësinë çdo studenti të përparojë.
“Për mbi 20 mijë studentët që fillojnë për herë të parë vitin e ri studentor, statistikat tregojnë se 9 nga 10 do të jetojnë në Tiranë dhe nuk do të kthehen në rrethin nga kanë ardhur. Kjo nuk duhet të na trembë. Unë besoj se Tirana sot është epiqendra e çdo zhvillimi politik-kulturor-ekonomik dhe mendoj se çdo djalë e çdo vajzë, pavarësisht si e kanë mbiemrin, pavarësisht çfarë lidhje ka me partitë, duhet të ketë një shans t’ia dalë me sukses në Tiranë dhe kjo është ambicia e Bashkisë së Tiranës”.
Kreu i Bashkisë së Tiranës ka ftuar studentët e rinj ti bashkohen rrjetit të vullnetarëve, ku qindra të rinj kryejnë punë në dobi të komunitetit.
