Erdogan “shtrin dorën e paqes”: Mund t’i dërgojmë një ftesë Asadit për t’u takuar në Turqi
Presidenti turk, Recep Tayyip Erdogan shprehu dëshirën e tij për të ftuar homologun sirian, Bashar al-Assad, për një vizitë në Turqi.
“Ne mund t’i dërgojmë një ftesë (Asadit) në çdo kohë,” u tha Erdogan gazetarëve gjatë një fluturimi nga Berlini, ku mori pjesë në “Euro 2024”, sipas agjencisë zyrtare të lajmeve Anadolu dhe mediave të tjera.
Erdogan ka thënë prej kohësh se mund të rishqyrtojë marrëdhëniet me Assadin.
Duke folur me gazetarët, ai tha se disa liderë, përfshirë presidentin rus Vladimir Putin, kishin propozuar takimin me Asadin në Turqi.
“Tani kemi arritur në një pikë të tillë që sapo Bashar al-Assad të bëjë një hap drejt përmirësimit të marrëdhënieve me Turqinë, ne do t’i tregojmë të njëjtën qasje”, tha Erdogan.
Komentet e Erdoganit vijnë pasi tensionet u përshkallëzuan gjatë javës së kaluar kundër refugjatëve sirianë në Turqi, ku një turmë sulmoi pronat dhe automjetet që u përkisnin sirianëve në qytetin qendror të Anadollit Kayseri.
