Partia AKP, e cila udhëhiqet nga presidenti turk Rexhep Taip Erdogan, ka kërkuar nga Bordi i Zgjedhjeve që të anulojë rezultatin për qytetin e Stambollit. Ajo pretendon se në lista pa pasur votues të paligjshëm, gjë që, sipas AKP , ka ndikuar në rezultatin e përgjithshëm.
“Është e drejtë e jonë t’i ankimojmë. Zgjedhjet lokale në Turqi kanë përfunduar dhe tashmë vendimi mbi epilogun e tyre është në duart e komisionit shtetëror. Nëse rezultatet e këshillave zgjedhore nuk korrespondojnë me tonat, atëherë Këshilli i Lartë Zgjedhor për ne do të jetë fjala e fundit.”, tha Recep Tayyip Erdogan.
Kërkesa për anulim të rezultatit në Stamboll erdhi pasi kandidati i partisë kryesore opozitare kishte deklaruar fitoren me rreth 19 mijë vota më shumë se rivali tij nga partia e Erdoganit.
Në orët e vona të ditës së enjte, zyrtarët e zgjedhjeve vendosën të bëhet rinumërimi i votave, por ende mbetet e paqartë se në cilat lagje do të zhvillohet ky proces.
Erdogan ka paralajmëruar edhe Shtetet e Bashkuara të Amerikës dhe Bashkimin Evropian që të mos përfshihen në punët e brendshme të Turqisë, pas deklaratave të fundit të Brukselit.
Sipas zëvendës presidentit të Komisionit Europian, Frans Timmermans, partia e Erdogan duhet të respektojë parimet bazë të demokracisë, pasi Turqia sipas tij i është larguar viteve të fundit me shpejtësi të madhe vlerave europiane.
Kjo mund të përkeqësohet, nëse nuk respektohen rezultatet e zgjedhjeve komunale nga AKP.
Sipas Bashkimit Europian e rëndësishme është që rezultati të kontrollohet në mënyrë të pavarur dhe në fund AKP të njohë rezultatin.
