Monedha turke vijon të jete ne krize. E ndërsa tensionet janë në rritje, presidenti turk Rexhep Tajip Erdoan ripërsëriti thirrjen që qytetarët të shesin monedhat e huaja, me qëllim që të përkrahin monedhën kombëtare. Erdogan foli për një komplot kundër Turqisë nga organizatorët e përpjekjes së dështuar të grushtit të shtetit në korrik të 2016.
“Vendi nuk është as i shkatërruar, as i falimentuar dhe as në krize. Dalja nga ky komplot ndaj monedhës, është rritja e prodhimit dhe minimizimi i normave të interesit. Ndaj, ju bëj thirrje shkoni në bankë dhe këmbeni monedhat e huaja në lira. Ata që nuk mund të na konkurrojnë me ne në terren, kanë sjellë komplote të parasë, por nuk kanë të bëjnë me realitetin e vendit tonë, prodhimit dhe ekonomisë reale”
Kriza e lirës turke vjen në një periudhë që marrëdhëniet mes SHBA dhe Turqisë janë ne kulmin e acarimit. Dy vendet kane mosmarrëveshje mbi një gamë të gjerë temash nga interesat e ndryshme në Siri, deri tek ambiciet e Ankarasë për të blerë sistemet e mbrojtjes ruse, por ajo që thelloi më tej krizën ishte rasti i pastorit amerikan Andrew Brunson, i cili është në gjyq në Turqi nën akuzat për terrorizëm.
