Një 22-vjeçar nga Velipoja ka rënë në prangat e policisë, pasi u kap në flagrancë duke qarkulluar me automjet, pavarësisht se ishte nën masën e sigurisë “arrest në shtëpi”.
I riu, i identifikuar si Flavio Gropaj, u ndalua nga shërbimet e policisë në momentin që po shpërndante lëndë narkotike në doza.
Gjatë kontrollit fizik dhe më pas në banesën e tij, policia gjeti dhe sekuestroi një armë zjarri tip pistoletë me municion luftarak, sasi të lëndës së dyshuar narkotike cannabis sativa të ndarë gati për shitje, si dhe automjetin me të cilin lëvizte.
Sipas policisë, i riu kishte thyer vendimin e Gjykatës së Shkodrës, e cila më herët i kishte caktuar masën e sigurisë “arrest në burg”, për akuzën “Prodhimi dhe shitja e narkotikëve”.
“Shërbimet e Policisë, bazuar në informacionet e siguruara se një shtetas që ishte me masë sigurie “Arrest në shtëpi”, dilte nga banesa dhe shiste lëndë narkotike në doza, kanë organizuar punën për kapjen e tij në flagrancë. Ata e kanë konstatuar shtetasin F. G., duke qarkulluar me automjet, në kundërshtim me vendimin e Gjykatës së Shkodrës, e cila i kishte caktuar masën e sigurisë “Arrest në burg”, për veprën penale “Prodhimi dhe shitja e narkotikëve”.
Gjatë kontrollit fizik ndaj këtij shtetasi dhe kontrollit në banesën e tij, shërbimet e Policisë gjetën një armë zjarri pistoletë me municion luftarak dhe doza të lëndës së dyshuar narkotike cannabis sativa, të cilat u sekuestruan në cilësinë e provës materiale, bashkë me automjetin.
Në përfundim të veprimeve, specialistët për Hetimin e Krimeve të Stacionit të Policisë Velipojë arrestuan në flagrancë shtetasin F. G., 22 vjeç, banues në fshatin Pulaj, për veprat penale “Largimi i të burgosurit nga vendi i qëndrimit”, “Mbajtja pa leje dhe prodhimi i armëve, armëve shpërthyese dhe municionit” dhe “Prodhimi dhe shitja e narkotikëve”.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme”, thuhet në njoftim.
/vizionplus.tv
