Në kuadër të operacionit të koduar “Operacionalja 67”, shërbimet e kësaj strukture lokalizuan dhe arrestuan në rrugën “Teodor Keko” të Tiranës, shtetasin:
Alban Bruçi, 28 vjeç, banues në Shkodër, i shpallur në kërkim me vendimin e vitit 2024 të Gjykatës së Shkodrës, për veprat penale “Vrasja me paramendim”, mbetur në tentativë dhe “Mbajtja pa leje dhe prodhimi i armëve, armëve shpërthyese dhe municionit”.
Gjatë kontrollit fizik, Bruçit iu gjetën dhe sekuestruan si prova materiale një shumë parash, 3 celularë, një kartë SIM dhe një kartë identiteti italiane e dyshuar si e falsifikuar.
Në pranga ra edhe një tjetër shtetas, Arjan Sardi, 37 vjeç, banues në Tiranë, i cili dyshohet se po transportonte me motomjet të kërkuarin Alban Bruçi në momentin e ndalimit. Edhe motomjeti u sekuestrua si provë materiale.
Të arrestuarit iu dorëzuan strukturave të Drejtorisë Vendore të Policisë Shkodër, për ekzekutimin e urdhrave për ndalim dhe arrestim.
Burime nga grupi hetimor bëjnë me dije se Alban Bruçi është identifikuar si autor i një atentati të dështuar të ndodhur më 7 shtator në qytetin e Shkodrës, ngjarje që dyshohet se ka pasur si motiv hakmarrjen.
Sipas hetimeve, shënjestra e sulmit ka qenë Arlind Kajoshi, personi që më herët kishte plagosur babain e autorit, Vladimir Bruçin. Por në momentin e atentatit, me automjetin tip “Land Rover” me targa AB230EO, po lëvizte vëllai i Arlind Kajoshit, i cili përfundoi gabimisht nën breshërinë e plumbave.
/vizionplus.tv
