Denis Brajoviç, 37 vjeç, i njohur si anëtar i grupit kriminal të Bajrave në Shkodër, pritet të ekstradohet këtë të mërkurë nga Emiratet e Bashkuara Arabe drejt Shqipërisë. Ai është i akuzuar për një sërë veprash të rënda penale, përfshirë vrasjen e Gjon Boriçit më 9 gusht 2020 në Shkodër.
Brajoviç u arrestua më 27 shkurt 2024 në Dubai, në kuadër të operacionit ndërkombëtar të koduar “The Wanted”, që është pjesë e bashkëpunimit mes Interpol Tiranës, Interpol Abu Dhabit dhe autoriteteve të Emirateve të Bashkuara Arabe.
Sipas njoftimit zyrtar të Policisë së Shtetit, ndaj tij rëndojnë pesë akuza të ngritura nga SPAK, që lidhen me veprimtarinë e grupit të strukturuar kriminal të Bajrave. Gjykata e Posaçme kundër Korrupsionit dhe Krimit të Organizuar i ka caktuar masën e sigurisë “Arrest në burg”.
Akuzat ndaj tij përfshijnë:
“Vrasja me paramendim”, në bashkëpunim në kuadër të grupit të strukturuar kriminal
“Prodhimi dhe mbajtja pa leje e armëve luftarake dhe municioneve”
“Grupi i strukturuar kriminal”
“Kryerja e veprave penale nga grupi i strukturuar kriminal dhe organizata kriminale”
“Sigurimi i kushteve dhe i mjeteve materiale për të kryer vrasje”, gjithashtu në kuadër të bashkëpunimit kriminal
Policia njoftoi se ekstradimi i tij është në fazat përfundimtare dhe orari i mbërritjes në Shqipëri do të bëhet i ditur me një komunikim të mëvonshëm.
/vizionplus.tv
