Një 48-vjeçar shqiptar ka qenë mes 11 të arrestuarve nga policia në disa rajone të Italisë në një aksion kundër trafikut të drogës.
Mediat italiane bëjnë me dije se 48-vjeçari shqiptar Elidon Buxheli drejtonte një rrjet kriminal midis Puglias, Molise dhe Marche.
48-vjeçari shqiptar akuzohet se promovoi, organizoi dhe drejtoi aktivitetin e paligjshëm së bashku me Di Nauta dhe Cursio.
Në më shumë se 100 faqe të urdhrit paraprak për arrestimin e shqiptarit theksohet se droga u vendos edhe jashtë rajonit, me udhëtime nga Lesina në San Benedetto del Tronto ku u shitën 13 kilogramë hashash. Zona e Ruvo di Puglia ishte gjithashtu në shënjestër.
Sasi të papërcaktuara kokaine dyshohet se u sollën nga Lesina në Cerignola nga vetë Buxheli dhe thuhet gjithashtu se shqiptari ka vepruar si furnizues me hashash dhe pluhur të bardhë për Cursio, Saço, Folla dhe Di Nauta.
Emri i Buxhelit përmendet në dokumentet e urdhrit të gjyqtarit hetues Bencivenga.
Sipas hetuesve ai është drejtori i trafikut të drogës që furnizon zonat italiane të drogës nga bregu i Adriatikut.
Një figurë kryesore në tregun e drogës, i aftë për të menaxhuar lëvizjen e sasive të mëdha të kokainës dhe kanabisit, duke mbajtur kontakte me importuesit.
Profili i “fantazmës” shqiptare
Nga letrat del një portret i saktë i Elidon Buxhelit: një personazh i zgjuar, i kujdesshëm dhe dyshues deri në pikën e paranojës.
Ai nuk merr kurrë askënd me vete, flet shumë pak edhe me bashkëpunëtorët e tij, mund të qëndrojë në makinë për orë të tëra pa thënë asnjë fjalë.
Komunikon vetëm nëpërmjet ëhatsApp, rrallë duke përdorur linjën tradicionale telefonike.
Ai është aq i kujdesshëm saqë, gjatë bisedave banale, ngurtësohet nëse e percepton qoftë edhe në mënyrë të paqartë idenë e një përgjimi telefonik ose praninë e një personi të infiltruar.
Ai frekuenton vetëm pikat e takimit “të testuara” që janë të përcaktuara shumë kohë më parë.
Ai është personi që furnizon Cursion dhe Saçon me substancën narkotike, duke menaxhuar kontaktet dhe lëvizjet si një ndërmjetës i paligjshmërisë.
Elidon Buxheli është aq i kujdesshëm saqë ka fituar nofkën “Xhuxhi i Keq” midis bashkëpunëtorëve të tij, për shkak të shtatit të shkurtër dhe mosbesimit obsesiv.
Gjatë periudhës së hetimit, ai përdori tre makina të regjistruara në emër të palëve të treta, por të gjitha në fakt ishin në përdorim ekskluziv të tij.
Falë përgjimeve dhe të dhënave GPS, u vërtetua se ai frekuentonte shtëpinë në via Santa Maria in Campomarino (CB) , ku Cursio dhe Saço jetonin së bashku dhe ku burri kishte qenë nën arrest shtëpiak që nga janari i vitit 2024.
