Qeveria ka ngritur një grup pune për të verifikuar të gjitha të dhënat, të cilat kanë lidhje me kompanitë shqiptare dhe emrat që do të dalin nga skandali financiar i “Panama Papers”. Ministrja e Zhvillimit Ekonomik, Milva Ekonomi tha se janë marrë të dhënat paraprake, por ajo u tregua e rezervuar, duke mos sqaruar nëse shteti ka të gjithë listën e emrave, të cilët kanë kryer punë përmes kompanisë Mosac Fonseca. Menjëherë pas këtij skandali, Agjencia e Trajtimit të Koncesioneve ka nisur verifikimin e të gjitha kontratave që shteti ynë ka lidhur me kompani që kanë selitë apo degë në “parajsat fiskale”. Një ditë më parë, Autoriteti i Konkurrencës u shpreh se është e vështirë të gjendet lidhja dhe origjina e firmave offshore që operojnë në vendin tonë.
